İlk yaz ayınıñ 25-ne keçken gecesi Qırımda patlav sesleri ve RF Ava mudafaasınıñ işi eşitildi, dep bildire Qırım telegram kanalları.
Hususan, "Krımskiy veter" kanalı Keriç, Canköy rayonı ve Canköyde olğan patlavlar aqqında yazdı. Berilgen malümatqa köre, Canköy civarındaki Rusiye arbiy ava limanına ücüm etildi, lâkin bu malümatnıñ tasdıqlanması şimdilik yoq.
Bundan ğayrı, Çauda burnu ve Qırımnıñ şimalinde rusiyeli ava mudafaasınıñ faal çalışqanı aqqında haber etildi. Rusiye Mudafaa nazirligi ilk yaz ayınıñ 25-nde saba Qırım üzerinde urulıp tüşürilgen dört uçucısız uçaq ve Qara deñizde yoq etilgen eki dron aqqında esabat berdi. Qırımğa ne qadar dron ücüm etkenini aytmaylar. Ukrayina tarafı vaziyetni daa izaatlamadı.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı "Ukrayina uçucısızlarına" qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün "esas telüke" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
