13 yılğa azatlıqtan marum etilgen qırımtatar Yaşar Müedinovnı evinden eki buçuq biñ kilometr uzaqlıqta yerleşken RF Arhangel vilâyetiniñ 5-nci SİZO-sına etap ettiler. Bu aqta onıñ ömür arqadaşı Nailâ İbragimova bildirdi, dep haber ete "Qırım birdemligi".
Al-azırda 57 yaşındaki qırımtatar karantin kamerasında buluna.
"Tranzitnen Qazan, Perm, Yaroslavlde oldı. Yolda hastalandı, amma tedaviylev ve ilâclar berildi", — dep tarif etti apayı.
2019 senesi saban ayında Rusiye quvetçileri Qırımda qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdi. 2019 senesi saban ayınıñ 27 ve 28 künleri Aqmescitteki Rusiye mahkemesi tutulğanlarnıñ episini apiske aldı.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
