Altın tamğalı kök bayraq. Qırımtatar bayrağı 1917 senesinden künümizge qadar (fotoresimler)
1917 senesi noyabr ayı. Birinci Qırımtatar Milliy Qurultayınıñ delegatları Bağçasarayda
1991 senesi iyun ayı. Ekinci Qurultaynıñ iştirakçileri Aqmescitte. Eki Qurultay arasında 70 yıl keçti. 20-nci asırnıñ başında qabul etilgen milliy bayraq sürgünlikten qaytqan qırımtatarlarnıñ qollarında
1991 senesi sentâbr ayı. Altın tamğalı kök bayraq Ukrayına Yuqarı Radasınıñ binasında yelpirey. Qırımlı faaller deputatlardan qırımtatar halqınıñ devletçiligini ğayrıdan tiklemege ve Meclisni qırımtatarlarnıñ temsiliy organı olaraq qabul etmege talap etti. Neticede narazılıq aktsiyaları «Kyiv-92» aktsiyasına çevirildi
1994 senesi iyün ayı. O vaqıt Qırımtatar Milliy Meclisiniñ reisi olğan Mustafa Cemilev odasınıñ divarındaki bayraqnen
2006 senesi mayıs ayı. Qırımtatar bayraqları narazılıq levhaları ve Ukrayına bayraqlarınen beraber. Mayısnıñ 18-nde qırımtatar sürgünliginiñ qurbanlarını añma kününde matem tedbiri
Oğlançıq Bütün dünya qırımtatar kongressi keçirilgen Bağçasaraydaki Han sarayında qırımtatar bayrağını tuta, 2009 senesi mayısnıñ 19-ı, foto müellifi Volodımır Prıtula
2011 senesi mayıs ayı. Yıl-yıldan, Qırımnıñ Rusiye işğaline qadar, Aqmescitniñ merkezinde büyük miting mayısnıñ 18-nde matem kününiñ bir vaqiası edi
Bayraq Aqmescitte general Petro Ğrığorenkonıñ abidesi yanında qırımtatar ve ukrayin vatandaş faalleriniñ aktsiyasında, Qırım, 2012 senesi oktâbrniñ 16-sı
Qırımtatar Milliy Meclisi toplağan Ukrayina topraq bütünligine qoltutuv mitinginde bayraqlar. Aqmescit, 2014 senesi fevralniñ 26-sı. Volodımır Prıtulanıñ fotoresimi
2014 senesi mayıs ayı. Qırım zapt etilgen ilk yılı Aqmescitniñ merkeziy meydanını mayıs 18-i arfesinde Rusiye OMONı sarıp aldı, şeerniñ merkezinde BTRler tura edi. Neticede qırımtatarlar Aqmescitteki Aqmeçet qasabasında toplaştı, matem tedbiri anda keçirildi
2015 senesi dekabr ayı. Aqmescitte qırımtatar toyunda milliy bayraq
2016 senesi mayıs ayı. Stokgolmdeki «Eurovision» yır yarışında Ukrayınanı Jamala temsil etti. Qoranta ve qırımtatar halqınıñ facialı tarihını o, «1944» yırında tarif etti. Bu yır oña ğalebe ketirdi.
Ancaq «Eurovision» reberligi qırımtatar bayrağını devlet bayrağı degil dep, yarış finalına ketirmege izin bermedi. Böylece qırımtatar bayrağı Rusiye qoltutqan «DNR» ve tanılmağan Pridnestrovye bayrağınen bir cedvelge kirsetildi
2016 senesi mayıs ayı. Qırımtatar bayrağı Kanadadaki Ontario provintsiyasında parlament ögünde köterile. Qırımtatar eyyeti anda 1944 senesiniñ sürgünlik qurbanlarını añma mitingini keçirdi
2016 senesi iyün ayı. Kyiv merkezinde qırımtatar bayraq kününde altın tamğalı mavı ava kürreleri
2016 senesi sentâbr ayı. Kefe yaqınlarındaki Bay Buğa (Blijneye) köyünde Qurban bayramına azırlıq vaqtında mustaqil ev büyükliginde qırımtatar bayrağı
2017 senesi mayıs ayı. Altın tamğalı bayraqlar sürgünlik qurbanlarını añma künü arfesinde Çatırdağ seferinde
2018 senesi mayıs ayı. Bir yıldan soñ – dağnıñ töpesinde
2018 senesi mayıs ayı. Qırımtatar bayrağı İstanbulda. 1990-larda Türkiye diasporası Qırımdaki semetdeşlerine milliy bayraqnen bağlı bilgi ve ananelerini bergen edi
2018 senesi iyün ayı. Qırımtatar bayraq kününe bağışlanğan ananeviy avtoyürüş
2018 senesi iyün ayı. Refat Çubarov qırımtatar Bayraq kününde Hreşçatıkte 40 metrlik milliy bayraqnı taşıy
2019 senesi yanvar ayı. Sudaqta qırımlı İlver Ametovnıñ müzey evi. Qırımtatar bayrağı 20 yıl devamında toplağan kollektsiyasınıñ ayırılmaz parçasıdır
2019 senesi iyün ayı. Kyivde Qırımtatar bayraq künü. 3-ke 4,5 metr büyüklikte bayraq dünyanıñ 28 memleketinden keçti, onı qırımtatar ve Ukrayına diasporalarınıñ vekilleri, siyasetçi ve faaller imzaladı
2019 senesi avgust ayı. Qırımnıñ cenübi-şarqındaki Qoz qasabasında taşlardan yapılğan taraq tamğa
2019 senesi dekabr ayı. Qırımtatar bayrağı milliy areketniñ veteranı Ayşe Seytmuratova yanında. O, yedi yaşında qızçıq olğanda sürgün etilgen edi. Qırımğa qaytuv ıntıluvları bir vaqıtları Lefortovo apishanesinen ve 3 yıl koloniyada keçirmesinen yekünlengen edi. 2025 senesi iyünniñ 1-nde Ayşe Seitmuratova Qırımda 89 yaşında vefat etti. Ayatı aqqında tafsilâtlıca mında oquñız
2020 senesi iyün ayı. Qırımtatar faalleri milliy areketniñ veteranı Ceppar Abducemilevge musafirlikke keldi. Ziyaretleri – bayraq kününe bağışlanğan marafonnıñ bir qısmı. Aktsiya iyünniñ 24-nde başladı ve bir qaç kün içinde iştirakçileri qırımtatar bayrağınen Qırımnı dolaştı. Finalda bayraq Qarasuvbazar rayonındaki Aq-Qayağa köterildi
Aralarında İlmi Umerov ve Volodımır Baluh da olğan qırımlılar qırımtatar bayrağını Ukrayina Yuqarı Radasınıñ binasına taşıy, 2021 senesi iyülniñ 15-i
Washingtonda Kommunizm qurbanlarınıñ abidesi yanında qırımtatar genotsidiniñ qurbanlarını añma merasiminde qırımtatar bayrağı, 2025 senesi mayısnıñ 18-i