Rusiye ordusı ilk yaz ayınıñ 25-ke keken gecesi Brânsk, Millerovo, Kursk, Primorsk-Ahtarsk — RF, Çauda — ilhaq etilgen Qırım yönelişlerinden Şahed tipindeki 71 çarpıcı dron ve çeşit pilotsız uçaqlarnı ücüm etti. Bu aqta Ukrayina arbiy ava quvetleriniñ matbuat hızmeti bildire.
Ukrayina arbiyleri 71 uçaqnıñ 52-sini yoq etti. Berilgen malümatqa köre, saat 09:00 ava mudafaası ateş vastalarınen 32 dronnı urıp tüşürdi, daa 20 REB tarafından yoq etildi. Odesa, Sumı ve Harkiv vilâyetlerinde altı yerde duşman dronlarınıñ urulması qayd etildi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.