Ukrayina prezidenti Volodımır Zelenskıy NATO baş kâtibi ve E5 formatı memleketleriniñ liderleri — Almaniya, Frenkistan, Büyük Britaniya, İtaliya ve Poloniya ile körüşüv aqqında bildirdi. O, ilk yaz ayınıñ 25-nde Gaagadaki NATO sammitinde olıp keçti.
Onıñ aytqanına köre, subet, ilk evelâ, Ukrayinanıñ ava mudafaasınıñ quvetleştirilüvi, hususan İran "Şahed"leriniñ toqtaılmasınen bağlı edi.
"Rusiyege yapılğan basqı ayrı muzakere etildi. Rusiye Federatsiyası ücüm areketlerini quvetleştirmekte ve cenkni toqtatmaq niyetini köstermey. Bu sebepten olarnıñ energetik ve bank sektorlarında, kölge flotuna qarşı çalışmaq, ekinci sanktsiyalarnı tayin etmek kerek", — dedi Zelenskıy.
O, ortaqlarğa ava mudafaası, reaktsion uçaqlarnen talim missiyaları ve "yañı yardım paketleri" içün teşekkürler bildirdi.
Keçende Frenkistan prezidenti Emmanuel Makron, Zelenskıy ile soñki Rusiye ücümleri aqqında laf etkenini bildirdi:
"Ukrayina üç aydan çoq vaqıt evelsi ABD prezidenti Donald Tramp tarafından teklif etilgen ateş toqtatılmasına razı olsa da, Rusiye barışıqnı red etmege devam ete... Ortaqlarımıznen beraberlikte Ukrayinada qaviy, devamlı ve telükesiz barışıq olması içün basqı yapmağa devam etecekmiz".
NATO baş kâtibi Mark Rütte ilk yaz 25-nde sammitniñ qapatıluvı vaqtında alyansnıñ maqsadı kelecekte istiqrarlı barışıq içün Ukrayinanıñ arbiy qabiliyetini qorçalamaq olğanını ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.